लखनऊ- उत्तर प्रदेशचे मुख्यमंत्री योगी आदित्यनाथ यांनी उच्चस्थरीय बैठक बोलावली. या बैठकीत बॉलिवूड गायिका कनिका कपूर विरोधात एफआयर नोंदवण्याचे आदेश आदित्यनाथांनी दिले. वस्तुस्थिती लपवल्याबद्दल आणि जनमानसाचं आयुष्य धोक्यात घातल्याबद्दल कनिकाविरोधात एफआयआर नोंदविण्यात येणार आहे. स्वतः मुख्यमंत्र्यांनी हे आदेश दिले आहेत.

सूत्रांनी दिलेल्या माहितीनुसार, कनिका कपूर करोनाच्या चाचणीत पॉझिटीव्ह निघाली. कनिका येथील ताज या पंचतारांकित हॉटेलमध्ये ६०२ या रूममध्ये राहत होती. ही रूम दोन दिवसांसाठी बंद करण्यात आली आहे. अधिकारी आता सीसीटीव्ही फुटेजमधून गायिका हॉटेलमध्ये कुठे कुठे फिरली ते शोधत आहेत.

कनिकाच्या पार्टीचे फोटो आले समोर; वसुंधरा राजे, दृष्यंत सिंगही पार्टीत

एका वरिष्ठ पोलीस अधिकाऱ्याने याबद्दल माहिती देताना सांगितले की, 'कनिकाविरोधात एफआयआर दाखल करण्यात येणार आहे. ती लंडनहून परत आली आणि भारतात आल्यावर तिला करोना व्हायरसबद्दल पूर्ण माहिती होती. असं असतानाही विमानतळावर तिने चाचणी केली नाही. करोनाची लक्षणं जाणवत असतानाही ती खुलेआम फिरत राहिली आणि गर्दीतही गेली.'