सिनेगायिका कनिका कपूरला करोनाची लागण झाल्यानंतर तिच्या संपर्कात आलेल्या २६६ लोकांचा शोध घेण्यात आला. त्यापैकी साठहून अधिक नमुने तपासले गेले आणि त्या सर्वांचा रिपोर्ट निगेटिव्ह आल्याची माहिती आरोग्य विभागाच्या अधिकाऱ्यांनी दिली. या २६६ लोकांपैकी जर कोणात करोना विषाणूची लक्षणे दिसली तर आणखी नमुने तपासले जातील, असंही ते म्हणाले.

राजस्थानच्या माजी मुख्यमंत्री वसुंधरा राजे आणि त्यांचे सुपुत्र दुष्यंत सिंह, उत्तरप्रदेशचे आरोग्यमंत्री जय प्रताप सिंह, माजी केंद्रीय मंत्री जतिन प्रसाद आणि त्यांच्या पत्नी नेहा यांचे रिपोर्ट निगेटिव्ह आले आहेत. “कनिकाच्या संपर्का आलेल्या संपूर्ण भारतातील २६६ जणांचा शोध आम्ही घेतला आहे. यामध्ये राजकीय नेत्यांचाही समावेश आहे. साठहून अधिक नमुने तपासले गेले आहेत आणि सर्वांचा रिपोर्ट निगेटिव्ह आला आहे. तिने भेट दिलेल्या सलूनचीही तपासणी आम्ही केली”, अशी माहिती स्टेट सर्व्हिलन्स ऑफिसर विकासेंदू अगरवाल यांनी दिली.