करोना व्हायरसचा फैलाव दिवसेंदिवस वाढत असून महाराष्ट्रात करोनाग्रस्तांची संख्या १३० वर पोहोचली आहे. अशातच सांगली जिल्ह्यातील इस्लामपूरमध्ये एकाच कुटुंबातील १२ जणांना करोनाची लागण झाल्याचं समोर आलं आहे. सर्वप्रथम २३ मार्च रोजी कुटुंबातील चार जणांना करोनाची लागण झाल्याचं स्पष्ट झालं होतं. ते हज यात्रेवरुन परतले होते. टाइम्स ऑफ इंडियाच्या वृत्तानुसार, यातील ११ जण इस्लामपूरचे रहिवासी आहेत. तर एक महिला कोल्हापूरच्या पेठवडगावची रहिवासी आहे. हज यात्रेवरुन परतलेल्या आपल्या नातेवाईकांची भेट घेण्यासाठी ती गेली होती.

सांगली जिल्ह्यात कोरोनाच्या रुग्णांची संख्या आता ११ वरुन २३ वर पोहोचली आहे. आज ज्यांचा रिपोर्ट पॉझिटिव्ह आला त्यांच्यामध्ये ६ महिला आणि ६ पुरुष यांचा समावेश आहे. हे सर्व इस्लामपूरमधील एकाच कुटुंबातील व्यक्ती आहेत.