सुरज चाटे वणी :- 'माहेरची दिवाळी' हा मराठी,हिंदी गीतांचा सुश्राव्य व बहारदार नृत्याचा कार्यक्रम संस्कार भारती समिती वणी तर्फे शहरात प्रथमच आयोजित करण्यात आला होता, 'सूर निरागस हो' या गीताने गणेशाच्या नामस्मरणाने कार्यक्रमाची सुरुवात करून त्र्यंबकेश्वर जाधव यांनी उपस्थितांची मने जिंकली.

जैताई देवस्थान व राज मंडप डेकोरेशन यांच्या द्वारे या कार्यक्रमाचे आयोजन करण्यात आले होते. या कार्यक्रमाचे उद्घाटक शिवसेना जिल्हाप्रमुख तथा माजी आमदार श्री विश्वास नांदेकर, ब्लॅक डायमंड इंटरनॅशनल स्कुल चे संचालक तथा भाजपा तालुका अध्यक्ष संजय पिंपळशेंडे, सामाजिक कार्यकर्ता नारायण गोडे, विद्यावाचस्पती स्वानंद पुंड, संस्कार भारती समिती वणी शाखेच्या अध्यक्षा सौ. रजनी पोयाम,जेष्ठ नाट्य कलावंत अशोक सोनटक्के यांनी दीप प्रज्वलन केले. यावेळी पल्लवी मसराम, पूजा देवाळकर, रूपाली सालकाडे ,अविनाश शिवनीतवार या गायक कलावंतानी पहिल्यांदाच सादरीकरण करून वणीकर रसिकांची मने जिंकली. 'प्रभाती सूर नभी रंगती' या भूपाळी गीताने सुप्रिया केदार हिने कार्यक्रमात रंजकता निर्माण केली. श्रुती चुंबळे हिने गायलेल्या 'आली माझ्या घरी ही दिवाळी' या गीतावर आकाश बोथले दिग्दर्शित कलावंतांनी नृत्यात ताल धरून रसिकांना आगळीवेगळी दिवाळी भेट दिली. 'दीपावली मनाई सुहानी ' या गीतांवर नृत्यदिग्दर्शक मंगेश चटारे यांच्या कलावंतांनी नृत्य सादर केले व त्यात शुभम गावंडे नी साईबाबांची अप्रतिम वेशभूषा सादर करीत रसिकांना अक्षरशः शिर्डीधामात आल्यासारखे वाटले. जैताई मातेला समर्पित गोंधळ सागर मुने यांनी ललाटी भंडार हा गोंधळ सादर केला व या गीतांवरील नृत्याने कार्यक्रमात वेगळीच रंगत निर्माण झाली. अश्या आगळ्यावेगळ्या पद्धतीचा कार्यक्रम वणीकर रसिकांसमोर नवोदित कलावंतांनी उत्कृष्टरित्या सादर केल्याने सर्व कलावंताचे कौतुक करण्यास रसिकानी कोणतीच कसर सोडली नाही .

संस्कार भारती समिती वणीचे संगीत विधा प्रमुख अभिलाष राजूरकर यांनी तबल्याची सुरेख साथ दिली. मायनर वर प्रथमच अतुल डफ यांनी वादन केले. ढोलक अक्षय करसे, अजित खंदारे व निखिल जिरकुंटवर यांनी सिंथेसायजर तर अमोल दुधलकर यांनी ऑक्टोपॅड वर सुरेख साथ दिली.या कार्यक्रमाला आलेल्या पाहुण्यांचे स्वागताला सौ सुनंदा गुहे यांनी स्वतःच्या हाताने पुष्पगुच्छ तयार केले. रांगोळी विधा प्रमुख सौ लता पांडे, पौर्णिमा पांडे यांनी सुरेख संस्कार भारती रांगोळी काढून रसिकांचे स्वागत केले. या कार्यक्रमाला विश्वास नांदेकर यांचे विशेष सहकार्य लाभले. त्यांनी सर्व कलावंतांना दिवाळीची भेट देऊन सर्व कलावंताचे स्वागत केले व पुढील वाटचाली करीता शुभेच्छा दिल्या. नईम अजीज, साई कॉम्प्युटर & लॅपटॉप गॅलरी, स्वरसाज म्युझिक अकॅडमी, सागर झेप संस्था यांनी या कार्यक्रमाला सहकार्य केले असून मार्गदर्शन माधवराव सरपटवार यांनी केले. यावेळी समितीचे पदाधिकारी, सदस्यगण व वणीतील नागरिक मोठ्या प्रमाणात उपस्थित होते. राजू तुरानकर, गणेश मत्ते, अमित उपाध्ये प्रशांत चौधरी यांनी कार्यक्रमा च्या यशस्विते करिता परिश्रम घेतले.