प्रशांत चंदनखेडे वणी :- शहरातील एका तरुणीचे अपहरण करून तिच्यावर अतिप्रसंग करण्यात आल्याची घटना २६ मे च्या रात्री ९ वाजताच्या सुमारास वणी मारेगाव हायवेवर घडली असून या घटनेने महिलांच्या सुरक्षिततेचा प्रश्न उपस्थित झाला आहे. या प्रकरणातील आरोपीची ओळख पटली नसून पोलीस त्याचा शोध घेत आहे.

शहरातील खाजगी रुग्णालयात काम कारणारी ही तरुणी रात्री ८.५० वाजताच्या सुमारास महाराष्ट्र बँके समोरून जात असतांना तिच्याजवळ एक पांढऱ्या रंगाची कार येऊन थांबली व त्यातील इसमाने तिला सुगम हॉस्पिटलचा पत्ता विचारला. तिने हॉस्पिटलचा पत्ता सांगून ती समोर जात असतानाच परत कार चालकाने तिच्याजवळ येऊन तिला हॉस्पिटल पर्यंत पोहचविण्याची विनंती केली. त्यानुसार ती गाडीत बसली व कार साईबाबा मंदिरापर्यंत पोहचल्यानंतर कार चालकाने कार नादेपेरा रस्त्याने वळवत अतिवेगाने बायपास मार्गे मारेगावकडे नेत असतांना तिने आरडा ओरडा केला पण कारचे काच बंद असल्याने व कारचे गेट लॉक असल्याने तिचा आवाज बाहेर पडू शकला नाही. कार चालकाने वणीपासून अंदाजे १० किमी अंतरावर कार रस्त्याच्या कडेला लावून तिला जीवे मारण्याची धमकी देत कारच्या मागील सीटवर तिच्यावर अतिप्रसंग केला व नंतर तीला नांदेपेरा रेल्वे क्रॉसिंग जवळ उतरवून तो कारसह पसार झाला. तरुणीने त्या इसमाला ओळखत नसल्याचे सांगून कारचा नंबर MH २९ २२८० असल्याचे सांगिले आहे. पीडित तरुणीच्या तक्रारीवरून अज्ञात आरोपी विरुद्ध भादवि च्या कलम ३६६,३७६(१),५०६ नुसार गुन्हा नोंदवून पीडित तरुणीला वैद्यकीय तपासणीकरिता यवतमाळला रेफर केले आहे. पोलीस अज्ञात आरोपीचा शोध घेत असून पुढील तपस पोलीस उप निरीक्षक गोपाळ जाधव करीत आहेत.