दुचाकीला वेल्डिंग करण्याच्या शुल्लक कारणावरून वेल्डिंग दुकानदारासोबत वाद घालीत त्याला दगडाने मारहाण करणाऱ्या आरोपीला अटक करून पोलिसांनी त्याच्या विरुद्ध गुन्हा दाखल केला आहे. सदर घटना २२ ऑक्टोबरला रात्रीच्या सुमारास वाटर सप्लाय समोर घडली. शिवशक्ती बलराम चव्हाण (३७) रा. वाटर सप्लाय जवळ, या वेल्डिंग दुकानदाराला गजानन होमदेव कनाके (२९) रा. वाटर सप्लाय समोर, याने वेल्डिंग करण्याचा तगादा लावत दगडाने मारहाण केली.

शहरातील वाटर सप्लाय समोर शिवशक्ती चव्हाण याचे वेल्डिंगचे दुकान आहे. आरोपी गजानन कनाके हा दुचाकीला वेल्डिंग करण्याकरिता त्याच्या दुकानात गेला. शिवशक्ती याने त्याला थोडावेळ थांबण्यास सांगितले असता तो आरडा ओरडा करीत त्याच्या अंगावर धावून गेला व त्याला दगडाने मारहाण केली. शिवशक्ती याने पोलीस स्टेशला दिलेल्या तक्रारीवरून पोलिसांनी आरोपी गजानन कनाके याला अटक करून त्याच्यावर भादंवि च्या कलम ३२४,५०४ नुसार गुन्हा दाखल केला आहे.

पुढील तपास पोलीस करीत आहे.