वणी नांदेपेरा रोडवरील रसोया फॅक्टरी पासून काही अंतरावर असलेल्या शेत शिवारात अज्ञात महिलेचा मृतदेह आढळून आल्याने एकच खळबळ उडाली आहे. शेत शिवारात बांधण्यात आलेल्या बंड्यालगत महिलेचा रक्ताच्या थारोळ्यात पडून असलेला मृतदेह सकाळी बंड्यावर कामाला जाणाऱ्या सालगड्याना आढळून आल्याने त्यांनी याबाबत शेत मालकाला माहिती दिली. व शेतमालकाने पोलीस स्टेशनला तक्रार दिल्याने पोलिसांनी घटनास्थळ गाठून मृतदेह उत्तरीय तपासणी करिता ग्रामीण रुग्णालयात पाठविला आहे.

वणी नांदेपेरा रोडवरील शेतशिवारात अंदाजे २५ वर्षे वयोगटातील महिलेची दगडाने ठेचून हत्या केल्याची खळबळ जनक घटना आज सकाळी उघडकीस आली. महिलेच्या चेहऱ्यावर दगडाने वार करून हत्या केल्याचे प्रथम दर्शनी समोर आले आहे. मृतदेहाजवळ रक्ताने माखलेला दगड पडून असल्याने तिला दगडाने ठेचून मारल्याचा अंदाज वर्तविण्यात येत आहे. मृत महिलेची अद्यापही ओळख पटली नसून परिसरात ना ना विध चर्चेला उधाण आले आहे. सकाळी बंड्यावर गेलेल्या सालगड्याना रक्ताच्या थारोळ्यात पडलेला मृतदेह आढळून आल्याने हे खळबळजनक उघडकीस आले. पोलीस मृतदेहाची ओळख पटविण्याचा प्रयत्न करीत असून घटनेचे मूळ शोधण्याचे कार्य सुरु आहे.