तालुक्यातील आत्महत्यांचे सत्र थांबता थांबत नसून एकामागून एक होणाऱ्या आत्महत्यांनी तालुका हादरला आहे. आज आणखी एका इसमाने मानसिक तणावातून आत्महत्या केल्याची घटना शहरापासून काही अंतरावर असलेल्या मोहर्ली गावात घडली आहे. सकाळी ७ वाजताच्या सुमारास गावातील लोकांना सदर इसम झाडाला गळफास घेतलेल्या अवस्थेत आढळून आल्याने गावात एकच खळबळ उडाली. राजेंद्र मेश्राम (४०) असें या गळफास घेऊन आत्महत्या केलेल्या इसमाचे नाव असून तो मूळचा मेंढोली येथील रहिवासी असल्याचे समजते. मागील १५-१६ वर्षांपासून तो मोहर्ली येथे परिवारासह रहात असून कोणतेही मजुरीचे काम करून प्रपंच चालवीत असल्याचे समजते.

तालुक्यातील मोहर्ली येथील राजेंद्र मेश्राम या चाळीस वर्षीय मजूर म्हणून काम करणाऱ्या इसमाने मानसिक तणावातून आत्महत्या केल्याचे बोलल्या जात आहे. काही महिन्यांपूर्वी त्याच्या मुलीने स्वमर्जीने विवाह केल्याचे समजते. आत्महत्ये सारखा टोकाचा निर्णय घेण्यामागचे कारण अद्याप कळू शकले नसून पोलीस तपासात खरं काय ते स्पष्ट होईल. मानसिक खच्चीकरणातून आत्महत्येसारखा पर्याय निवडून जीवनातून मुक्त होण्याचे प्रकार आता चांगलेच वाढू लागले आहे. सतत होणाऱ्या आत्महत्यांनी तालुका हादरला आहे. राजेंद्र मेश्राम याच्या या अकाली जाण्याने गावात शोककळा पसरली आहे.