सागर मुने, वणी

संत गाडगेबाबा अमरावती विद्यापीठ अमरावती द्वारा घेण्यात आलेल्या उन्हाळी २०१९ च्या इतिहास विषयाच्या पदव्युत्तर परीक्षेत लोकमान्य टिळक महाविद्यालयाच्या तब्बल तीन विद्यार्थिनींनी गुणवत्ता यादीत स्थान पटकावले आहे.

विशेष उल्लेखनीय बाब म्हणजे पल्लवी प्रकाश भटारकर हिने संपूर्ण विद्यापीठात प्रथम क्रमांकाचे स्थान मिळवले आहे.

तिच्यासोबत मनीषा प्रेमनाथ जीवतोडे हिने चतुर्थ स्थान तर भारती रणजीत शेरकी हिने आठवे स्थान प्राप्त केले आहे. महाविद्यालयाच्या दृष्टीने अत्यंत अभिमानास्पद अशा या कामगिरी करिता शिक्षण प्रसारक मंडळाचे अध्यक्ष नरेंद्र नगरवाला, उपाध्यक्ष रमेश अणे, सचिव लक्ष्मण भेदी, सहसचिव अशोक सोनटक्के यांच्या सह सर्व संचालक, महाविद्यालयाचे कार्यकारी प्राचार्य डॉ. प्रसाद खानझोडे, इतिहास विभाग प्रमुख रेखा बडोदेकर यांनी या तिघींचेही अभिनंदन केले आहे.

इतिहास विषयाच्या विभाग प्रमुख डॉ.बडोदेकर मार्गदर्शनात पदव्युत्तर विभागाचे अध्यापक प्रशांत पाठक, सुवर्णा बुऱ्हाण, आनंद बनसोड आणि मनीष पारखी यांच्या अथक प्रयत्नाने हे यश प्राप्त झाले आहे. हे सर्व अध्यापक देखील याच विभागाचे माजी विद्यार्थी आहेत हे विशेष वैशिष्ट्य आहे.

वणी सारख्या सुदूर क्षेत्रातील तालुकास्तरावरील महाविद्यालयांने मिळवलेले हे देदीप्यमान यश, एकाच महाविद्यालयाच्या तीन विद्यार्थीनी गुणवत्ता यादीत असणे कदाचित विद्यापीठाच्या इतिहासात पहिलीच घटना असावी.

यशस्वी विद्यार्थिनींचे अभिनंदन करताना संस्थेचे सचिव लक्ष्मण भेदी. प्राचार्य डॉ प्रसाद खानझोडे तथा विभागाचे प्राध्यापक.