•शासकीय कार्यक्रमाचे एकाही पत्रकाराला निमंत्रण नाही

प्रतिनिधी/ सचिन मेश्राम (मारेगाव)

आज शुक्रवारी दिनांक 7 फेब्रुवारी रोजी सकाळी वणी येथील शासकीय मैदानावर जिल्हास्तरीय महसूल क्रीडा व सांस्कृतिक स्पर्धेचा उद्घाटन सोहळा पार पडत आहे. या समारंभाच्या उद्घाटनासाठी प्रशासकीय सेवेतील जिल्ह्यातील बडे अधिकारी येत आहेत. या उद्घाटन सोहळ्यात उपस्थित राहण्यासाठी अनेकांना निमंत्रण पत्रिका देण्यात आली आहे. मात्र वणी आणि परिसरातील कोणत्याही पत्रकारांना या सोहळ्यात उपस्थित राहण्यासाठी निमंत्रित करण्यात आलेले नाही.

महसूल विभागाला पत्रकारांचे वावडे का?

कोणत्याही शासकीय कार्यक्रमात पत्रकारांना निमंत्रण देण्याची प्रथा फार पूर्वीपासून आहे. महसूल विभागाबाबत बोलायचे झाल्यास शासकीय जनजागृतीचा कार्यक्रम असो किंवा शासनाच्या योजना वा उपक्रम त्या गोरगरीब जनतेपर्यंत तसेच तळागाळात पोहोचवण्यासाठी पत्रकारांची गरज भासते. महसूल विभाग तेव्हा आवर्जून पत्रकारांना संपर्क साधते. अशा कार्यक्रमाचे न विसरता निमंत्रण देते. मात्र या कार्यक्रमाबाबत महसूल विभागाला पत्रकारांचे वावडे का? हे कळायला मार्ग नाही.

वणीत उपविभागात रात्री रेतीची तस्करी जोमात सुरू आहे. सुटीच्या दिवशी तर या तस्करीला आणखीनच बहर येतो. मध्यंतरी एका पक्षाने याबाबत तहसिलदारांची तक्रार पण केली होती. उद्घाटन सोहळ्याला मोठ्या संख्येने प्रशासकीय अधिकारी येत आहेत. त्यांच्यापर्यंत या गोष्टी पत्रकार पोहोचवू शकतात किंवा याबाबत कार्यक्रमात पत्रकार प्रश्न विचारू शकतात या भीतीने तर महसूल विभागाने पत्रकारांना जाणून बुजून या कार्यक्रमापासून दूर ठेवलेले नाही, असा दाट संशय निर्माण होत आहे.

पत्रकारिता ही लोकशाहीचा चौथा स्तंभ मानली जाते. पूर्वीपासून शासकीय निमशासकीय, सार्वजनिक कार्यक्रमांना पत्रकारांना निमंत्रीत करण्याची प्रथा आहे. मात्र महसूल विभागाने या प्रथेला छेद देत कोणत्याही पत्रकाराला निमंत्रीत न करून एक प्रकारे पत्रकारांचा अपमान केला आहे. महसूल विभागाच्या या कृतीचा सर्व पत्रकार जाहीर निषेध करीत आहे.