टीम इंडियाची युवा धडाकेबाज फलंदाज शफाली वर्मा हिने जागतिक टी २० फलंदाजांच्या क्रमवारीत अव्वल स्थान पटकावले आहे. ICC ने महिला टी २० क्रिकेटपटूंची ताजी यादी जाहीर केली. यात शफाली तब्बल १९ स्थानांची झेप घेत पहिल्या स्थानी विराजमान झाली आहे. तिने न्यूझीलंडची अनुभवी खेळाडू सुझी बेट्स हिला मागे टाकले. सुझी बेट्स हिची एका स्थानाने घसरण होऊन ती दुसऱ्या स्थानी घसरली आहे. सुझीचे ७५० गुणांक आहेत, तर शफाली ७६१ गुणांकासह अव्वल आहे. ऑक्टोबर २०१८ पासून सुझी अव्वल स्थानी होती. अखेर १७ महिन्यांनी तिला दुसऱ्या स्थानी ढकलत शफालीने अव्वल स्थान पटकावले.