जेष्ठ कलावंत अशोक सोनटक्के यांचा रंगभूमी दिना निमित्त सत्कार

येथील सागर झेप नाट्य संस्थेद्वारा जागतिक रंगभूमी दिन साजरा करण्यात आला. या प्रसंगी येथील जेष्ठ कलावंत अशोक सोनटक्के यांचा सत्कार करून त्यांच्याप्रति कृतज्ञता व्यक्त करण्यात आली. स्वा.सावरकर नगर परिषद शाळा क्र.5 मध्ये आयोजित या कार्यक्रमाच्या अध्यक्षस्थानी प्रेस वेलफेअर असोसिएशनचे अध्यक्ष गजानन कासावार होते. प्रमुख अतिथी म्हणून जेष्ठ रंगकर्मी अशोक सोनटक्के होते. शहराला सांस्कृतिक वारसा लाभला असून नाट्य कलावंत आपल्या रसिकांना समाजातील होणाऱ्या घटना अभिनयातून दाखवतो. आपल्या अभिनय कलेने रसिकांची मने जिंकणारे, वणी शहरात मागील पाच दशकापासून निःस्वार्थ पणे रंगदेवतेची सेवा करणारे नाट्यकर्मी टिळक महाविद्यालयाचे सहसचिव, जेष्ठ नाट्य कलावंत अशोक सोनटक्के यांचा जागतिक रंगभूमी दिना निमित्ताने सत्कार होणे ही सुद्धा एक प्रकारे रंगदेवतेचा सन्मान आहे. अशी प्रतिक्रिया गजानन कासावार यांनी व्यक्त केली. या प्रसंगी आयोजक संस्थेचे अध्यक्ष सागर मुने यांनी वणी येथील नाट्य चळवळ पुन्हा पुनरुज्जीवित केल्याबद्दल त्यांचा सुध्दा सत्कार करून पुढील वाटचालीसाठी शुभेच्छा दिल्या.

याप्रसंगी सुनंदा गुहे, अमोल खडसे, शुभम उगले, आकाश महादुले यांनी रंगभूमी दिना निमित्त मनोगत व्यक्त केले. या कार्यक्रमाचे सूत्रसंचालन प्रवीण सातपुते यांनी तर आभार प्रदर्शन मंगेश गोहोकार याने केले. शंतनू मुने, लीना गुप्ता, निकुंज सातपुते, निकिता बोबडे, प्रणय मुने, अविनाश शिवणीतवार, सुभाष गुहे या नाट्य रसिकानीं कार्यक्रमाच्या यशस्वीतेसाठी परिश्रम घेतले.