पालघर जिल्ह्यात रोजगाराची संधी नसल्याने दरवर्षी जिल्ह्याच्या आदिवासी भागातील ६० ते ७० टक्के मजूर आपल्या कुटुंबासह स्थलांतरित होत असतात. मुंबई, ठाणे, वसईसह गुजरात राज्यात मोठ्याप्रमाणावर हे मजूर कामाच्या शोधात जात असतात. यावर्षीही या स्थलांतरित झालेल्या मजूरांवर लॉकडाऊनमुळे परतावे लागले आहे. लॉकडाऊनमुळे हे मजूर ठिकठिकाणी अडकून पडले असून हाताला काम नाही आणि त्यात कोरोनाच्या भीतीने आपलं घर गाठण्याच्या ओढीने प्रवासाचे कोणतेही साधन नसताना हे मजूर पायपीट करत निघाले आहेत. यासंदर्भातील वृत्त प्रसिद्ध झाल्यानंतर जिल्हा प्रशासनाचे अधिकारी अच्छाड नाक्यावर दाखल झाले असून या ५०० हून अधिक संख्येने असलेल्या मजूरांची वैद्यकीय तपासणी करून वाहनाने घरी सोडण्याची व्यवस्था प्रशासनाकडून करण्यात येत आहे.