चेन्नई : आपल्याच बहिणीवर सतत बलात्कार करणाऱ्या १५ वर्षीय भावाला अखेर पोलिसांनी बेड्या ठोकत बहिणीची त्याच्या अत्याचारापासून सुटका केली आहे. पॉक्सो कायद्यांतर्गत या अत्याचारी भावावर पोलिसांनी गुन्हा नोंदवला आहे. घरगुती भांडणांनंतर आरोपीचे वडील गेल्या वर्षी घर सोडून गेले होते. आरोपी आणि पीडित मुलगी आपल्या आईजवळ राहत होते. आरोपी आपल्या बहिणीहून ४ वर्षांनी मोठा आहे. त्यांच्या आईने एका व्यक्तीबरोबर लग्न केले असून हे सर्वजण एकाच घरात राहत आहेत.

पीडित बहिणीने घडत असलेला सारा प्रकार आपल्या मैत्रिणीला सांगितल्यानंतर ही बाब उघड झाली. यानंतर पीडितेच्या मैत्रिणीने हा सगळा प्रकार पीडितेच्या आईला सांगितला. त्यानंतर केलेल्या तक्रारीच्या आधारावर विल्लिवक्कम-ऑल विमेन पोलिस ठाण्यात एफआयआर दाखल करण्यात आला. या नंतर पोलिसांनी चौकशीसाठी भावा-बहिणीला पोलिस ठाण्यात बोलावले.

या अत्याचाराबाबत पोलिसांनी दिलेल्या माहितीनुसार, हा अत्याचारी भाऊ आपल्या बहिणीचे हात आणि पाय बांधून तिच्यावर बलात्कार करत असत. डिसेंबरपासून आतापर्यंत जेव्हा दोघेच घरात असत तेव्हा तेव्हा त्याने संधी साधत त्याने बहिणीवर बलात्कार केले.

ही बाब कधीही कुणाला सांगायची नाही, अशी धमकीही आरोपीने बहिणीला दिली. आरोपीला पॉक्सो कायद्यांतर्गत अटक केली आणि त्याची रवानगी निरीक्षण गृहात करण्यात आली. तर, पीडितेला समुपदेशनासाठी पाठवण्यात आले. या आरोपीने या घटनेचा व्हिडिओ तर नाही ना बनवला, याचीही तपासणी पोलिस करत आहेत. याचे कारण म्हणजे त्याच्याकडे स्मार्टफोनही असल्याचे पोलिसांनी सांगितले.