हिंदुत्वाचा नवा चेहरा आणि भूमिका धारण केल्यानंतर महाराष्ट्र नवनिर्माण सेना (मनसे) राज्यातील परदेशी घुसखोरांबाबत आक्रमक झाली आहे. नुकतीच पुण्यात एक कारवाई केल्यानंतर आता मनसेने राज्यातील इतर भागांकडे आपला मोर्चा वळवला आहे. त्यानुसार, पाकिस्तानी आणि बांगलादेशी घुसखोरांची माहिती देणाऱ्या ५ हजार रुपयांचे बक्षीस मनसेनं जाहीर केलं आहे. औरंगाबादसह इतर काही ठिकाणी यासंदर्भात पोस्टर्स लावण्यात आली आहेत.

“घुसखोर हटाओ, देश बचाओ. पाकिस्तानी आणि बांगलादेशी घुसखोरांची अचूक माहिती पुराव्यानिशी देणाऱ्यास महाराष्ट्र नवनिर्माण सेनेतर्फे रोख ५००० रुपये देण्यात येतील.” असा मजकूर या पोस्टर्समध्ये छापण्यात आला आहे. यामध्ये मनसे अध्यक्ष राज ठाकरे यांचा फोटोही लावण्यात आला आहे.